ប្រូតេអ៊ីនមួយអាចបង្កើនទិន្នផល និងភាពធន់និងជម្ងឺ ចំពោះដំណាំស្រូវ

សង្ខេប៖ ការស្រាវជ្រាវមួួយដោយ Wang et al. (២០១៨) ចេញផ្សាយនៅទស្សនាវដ្តីវិទ្យាសាស្ត្រ Science បានបង្ហាញថា ប្រូតេអ៊ីនចម្លងក្រម Ideal Plant Architecture 1 (IPA1) តែមួយអាចជួយបង្កើនទិន្នផលផង និងភាពស៊ាំចំពោះជម្ងឺផ្សិតផង។ 

ពិសោធន៍៖ ធម្មតាដើម្បីប្រឆាំងនឹងជម្ងឺ រុក្ខជាតិត្រូវបែងចែកធនធាន ពីការលូតលាស់ទៅប្រព័ន្ធភាពស៊ាំ ហើយចំពោះដំណាំ ការណ៍នេះអាចបណ្តាលឲ្យថយចុះនូវទិន្នផល។ Wang et al. បានបង្ហាញថា ចំពោះដំណាំស្រូវ ផូស្វ័រកម្មបញ្រ្ចាស (reversible phosphorylation) នៃប្រូតេអ៊ីនចម្លងក្រម IPA1 អាចឲ្យស្រូវប្រឆាំងនឹងការវាយប្រហារពីជម្ងឺប្លាស បង្ករឡើងដោយផ្សិត Magnaporthe oryzae ហើយក្រោយមកអាចបង្វែរធនធានទៅការលូតលាស់វិញ ដោយកាត់បន្ថយគុម្ពស្រូវមិនអំណោយផល និងបង្កើនចំនួនគ្រាប់ស្រូវក្នុងមួយគួរ។

Wang និងក្រុមគាត់បានរកឃើញថា IPA1 ភ្ជាប់ទៅនឹងតំណលំដាប់ DNA GTAC (Motif 1) ដើម្បីជម្រុញការលូតលាស់។ ក្រោយពេលឆ្លងជម្ងឺពីផ្សិត M. oryzae IPA1 រងផូស្វ័រកម្ម ដោយប្រូតេអ៊ីន Kinase មិនស្គាល់មួយ ហើយដូរទៅភ្ជាប់នឹងតំណលំដាប់ TGGGCC/T (Motif 2) ជម្រុញភាពស៊ាំនឹងផ្សិត M. oryzae។ ក្រោយពីភ្ងោចភាពស៊ាំហើយ IPA1 បកទៅជម្រុញការលូតលាស់វិញ (ព្រួញពណ៌ប្រផេះ) ដោយបន្ធូរបន្ថយការបាត់បង់ទិន្នផល (រូបភាពទី១)។

រូបភាពទី ១ តួនាទីរបស់ប្រូតេអ៊ីនចម្លងក្រម IPA1។ ប្រភព៖ Science

ឯកសារយោង៖ Wang et al. (2018). A single transcription factor promotes both yield and immunity in rice. Science, 361(6406), 1026-1028. DOI: 10.1126/science.aat7675